Shek Macammad Awwal Cayat Elle yoobokeeh, elle catem fanti rasuk yallô daqaaraay, Ahama Nasakaxxe ní kaxxa qaalimtuuy, shekh M.d Awwal shekh cayaat deqsita kinni. Ubukiyah ayro khamisti ayrooy shaqbaan alsaay, hijrâ loowok 1385 haytô sanatah yallô daqaaral yoobokeeh, kay ina Caawa macammad deqsitak ten.
Qhur'aan qunxamariinol elle kay abbal barteeh, qaqhiidâ kitoobak tawciid kee Arbaquunâ nawawi kee kalah tan qunxa qunxa kitoobay Canafi kee shaafiqi fiqhih mazhabitte edde anuk isi abbal barteeh, tonnaah fidin matani leh tan kitooba axcih fiqhih kitooba kee qhur'aan tafsiir kay abbah darasaytuh sugeh yan shekh m.d redwaan yacayal kattaateeh, Cadiis kitooba axcih bulgh Al-muraamaay, riyaadû saaliciiniiy, muntakhul akhbaaraay, neelul awtaar ittallakleh barteeh, tokkeek kutubû sitta (6) kee kalah kaadu mustalac Alcadiis, kay abbah darasaytuh sugeh yan shekh m.d dubu deqsita qaalintul (yalli kaah racmatay) kattateeh. Qarab afih kitooba shekh m.d Qabdalla nuuruy Azhar jaamiqatal bartek tabseemit yaaban.
Tokkeek 1400 hijrâ loowh suquudi qarabiya fanah qumarah gexeeh, shekh ibnu baazat yongooroweeh kaallih itta barten. Tokkel qabdu qhaadi kee makki daarul cadiisih maray 1370-1375 fanah kay abbâ lih baritteh tan mashayikh geeh, tokkel sheykh ibnu baaz caramal 6 alsih gide daffeyam kee kaxxa kaxxa kitoobah darsi kay calaqhat gacak akah kattaatah yan innah kaah absiise.
1980 i.l.l /1412 Ethiopiyah doolat shariiqâ ludda xiseh yan waqdi sultaan qali mirac kee kalah tan qolomâ lih gacak qafár rakaakayak majlisul Aqla malah buxa xisaanam aben. 1418 Qafár rakaakayak fayyale cukmih buxa isi xiqtuh qoloma kee doolat lih gacak maqar le taama abeeh, tonnaah, 1430 markazul cayaat migaq akah aben qhur'aan aliilisiyya kee tarbiyaay kalah tan barittoh fanteena xiseeh. Tokkeek majlis kee fayyale qolomâ lih gacak fatwa kee qilmi wagittaamal kusaq abtah tan qoloma doorak baxaa baxsa le taama abeeh, tinna luk qarabih afih baritto baarisanam takku say marih solot elle yakkeh yan uma gurra yaybleeleqeenimil kaxxam fula le taama abem xiqeeh. Shekh M.d Awwal cayaat affara barrál rihimeeh, 4 takke buxah inontik 17 takke xaylo xaleeh, asaaku qafár rakaakayak islaaminnâ caagiidak naharsi saqal akkuk isi ummatta ayfoofuk geytima.